Борбите во Судан се намалија во текот на ноќта откако армијата и паравоените сили се согласија на тридневен прекин на огнот, дозволувајќи им на повеќе Суданци да ја напуштат земјата, а странските земји да ги извлечат своите државјани.
Војната што избувна меѓу армијата и паравоените сили за брза поддршка (РСФ) на 15 април ги претвори станбените области во воени зони. Најмалку 459 луѓе загинаа, а повеќе од 4.000 се повредени. Жителите останаа без вода, струја и храна во земјата која веќе се потпира на помош.
Повеќе напади врз дипломати, застрелан Египќанец на пат кон работа
Странските земји го префрлија персоналот на амбасадата од главниот град Картум, по неколку напади врз дипломати, вклучувајќи го и убиството на египетскиот аташе кој беше застрелан на пат кон работа. Некои земји ги извлекуваат и своите граѓани кои приватно престојуваат во земјата.
Во вторникот, Британија започна голема евакуација на своите државјани со воени авиони од аеродром северно од Картум. Франција и Германија соопштија дека евакуирале повеќе од 500 луѓе од различни националности.
Суданските семејства, исто така, го искористија затишјето да ги напуштат своите домови по повеќе од една недела жестоки борби во потрага по транспорт за да ги однесат на безбедно, загрижени дека егзодусот на странците дополнително ќе ги доведе во опасност локалните жители.
Децата се криеле под креветот
„Можеби најтешкиот момент е размислувањето за напуштање на земјата“, рече Интисар Мохамед Ел Хаџ, жителка на Картум, која рече дека нејзините деца се сокриле под креветот од звукот на експлозии пред семејството да побегне во Египет.
Десетици илјади луѓе во изминатите неколку дена заминаа во соседните Чад, Египет, Етиопија и Јужен Судан, и покрај несигурноста на условите таму.
Ситуацијата за оние кои останаа во третата по големина африканска земја, каде на една третина од 46 милиони луѓе им требаше помош уште пред насилството, брзо се влошува. Некои изразија очај поради заминувањето на некои меѓународни хуманитарни агенции и дипломати.
Хуманитарната канцеларија на Обединетите нации денеска соопшти дека ги намалила своите активности поради борбите.