featured

Макрон: Потребен е консензус пред Путин да биде поканет на самитот на Г-20

Францускиот претседател Емануел Макрон истакна во четвртокот дека членките на Г-20 ќе мора да постигнат консензус пред рускиот лидер Владимир Путин да биде поканет да присуствува на самитот на групата во Бразил во ноември, пренесува „Франс прес“.

„Значењето на овој клуб е дека мора да постои консензус со другите 19. Тоа ќе биде работа на бразилската дипломатија. Ако таков состанок може да биде корисен, тоа мора да се направи “, посочи Макрон на заедничката прес-конференција со својот колега Луис Инасио Лула да Силва во Бразилија, и предупреди дека поделбата по ова прашање може да ја уништи поканата за Русија.

Бразил, актуелниот претседавач со групата Г-20 – која претставува 80 отсто од глобалната економија – се спротивстави на обидот предводен од САД да се изолира и казни Русија за својата инвазија на Украина, тврдејќи дека украинскиот претседател Володимир Зеленски и западните земји делат дел од вината за војната.

Путин го пропушти минатогодишниот самит на Г-20 во индиската престолнина Њу Делхи, избегнувајќи ги евентуалните жестоки политички критики и каков било ризик од кривичен притвор според налогот за апсење на Меѓународниот кривичен суд (МКС).

Во септември 2023 година, Лула рече дека „нема шанси“ Путин да биде уапсен ако присуствува на самитот во Рио де Жанеиро, но набргу потоа отстапи од својот став и рече дека за евентуалното апсење на Путин ќе одлучи судскиот систем, а не неговата влада.