featured

Хамас за прв пат им се извини на жителите на Газа

Исламското движење Хамас за прв пат им се извини на жителите на Газа за страдањата предизвикани од војната во долгата изјава објавена на нивниот канал Телеграм.

Хамас, кој ја започна војната со напад врз јужен Израел на 7 октомври, во кој неговите борци убија 1.200 луѓе, главно цивили, и зедоа 253 заложници, се „извини“ за неволјата предизвикана од шестмесечната војна против Израел. Но ја повтори својата волја за продолжување на војната, која, според нив, треба да овозможи „победа и слобода“ на Палестинците.

Тоа радикално исламистичко движење испрати „порака за благодарност до луѓето“ во Појасот Газа и ја призна нивната „исцрпеност“ и рече дека се обидело да усвои мерки што ќе ги ублажат последиците од војната, особено обидите за „контрола на цените“ под дадените околности.

Хуманитарните потреби се големи, но помошта пристигнува во енклавата споро, а мнозинството од населението е внатрешно раселено и сега се наоѓа на самиот југ, во близина на градот Рафах на утврдената египетска граница. Според ОН, тој град пред војната имал 300.000 жители, а сега во него има околу милион луѓе.

Голем број лидери на Хамас, како Калед Мехал, поранешен шеф на политичкото крило, во последните месеци велат дека „потребни се жртви“ за „ослободувањето“ на Палестинците.