Десет лица загинаа денес кога ракета од Либан падна на фудбалско игралиште во село на Голанската висорамнина, јави израелскиот Канал 13, покрај деветмината загинати, многумина се ранети, додаде телевизијата.
Претходно беше соопштено дека во нападот деветмина се тешко ранети и дека се работи за деца и млади на возраст од 10 до 20 години.
Припадник на израелската служба за итни случаи опиша големо уништување и пожар на местото на настанот, фудбалско игралиште во селото Мајдал Шамс.
Израелската армија соопшти дека помага во евакуацијата на повредените.
Израелците веднаш го обвинија Хезболах за лансирање на ракетите, но групата ги негираше обвинувањата. Хезболах рече дека тие „немаат апсолутно никаква врска со инцидентот и категорично ги отфрлаат сите лажни обвинувања“.
Хезболах претходно соопшти дека лансирал десетици ракети врз воена база на Голанската висорамнина, во близина на Мајдал Шамс.
Израелскиот министер за надворешни работи Израел Кац изјави дека разговарал со премиерот Бенјамин Нетанјаху по смртоносниот напад врз Мајдал Шамс, но не наведе детали од разговорот.
„Нема сомнеж дека Хезболах ги премина сите црвени линии. Се соочуваме со сеопфатна војна“, рече Кац.
Тој рече дека Израел ќе има „целосна поддршка“ од САД и Европа, но одби да каже каков ќе биде одговорот на Израел.
Неименуван дипломатски извор потврди дека Нетанјаху моментално одржува безбедносни консултации во САД, каде престојуваше во последните неколку дена.