Американскиот претседател Џозеф Бајден ќе го одржи главниот говор на Демократската национална конвенција во Чикаго во понеделник, кога симболично ќе го предаде раководството на партијата на потпретседателката и демократска претседателска кандидатка Камала Харис.
Во својот говор, Бајден ќе инсистира дека тоа ќе претставува закана за демократијата во САД доколку поранешниот американски претседател и републикански претседателски кандидат Доналд Трамп се врати во Белата куќа, изјавија помошниците на Бајден, пренесува АП.
Помошниците очекуваат говорниците на конвенцијата да се осврнат на достигнувањата на Бајден за време на неговото претседателствување, вклучително и мерките спроведени за време на пандемијата, до големите инфраструктурни инвестиции и реформите во здравствената заштита.
Најавено е дека првата дама на САД Џил Бајден и други членови на семејството Бајден ќе бидат присутни на Демократската национална конвенција во Чикаго.
Бајден беше пречекан со извици „Благодарам Џо!“ кога во четвртокот се појави со Харис во Мериленд на митинг каде што се појавија заедно за прв пат откако тој се повлече од кампањата за реизбор. На тој состанок тие презентираа договор за намалување на цените на 10 најчесто користени лекови во САД, јавува Ал Џезира Балканс.
Бајден се повлече од кампањата за реизбор на 21 јули по притисокот од Демократската партија да го стори тоа, кога го поддржа Харис да биде демократски кандидат за претседател.