Францускиот претседател Емануел Макрон го назначи поранешниот еврокомесар и преговарач за Брегзит Мишел Барние за нов премиер на Франција.
Францускиот претседател Емануел Макрон го назначи Барние (73), републиканец, за нов премиер, два месеци откако предвремените избори завршија во политички ќорсокак.
Макрон побарал од Барние да „формира влада на национално единство во служба на земјата“, јавуваат француските медиуми.
Пред именувањето, Макрон се погрижил Барније целосно да ги исполни условите за стабилност и национално единство, пренесува „Паризиен“.
Кој е Барние?
Ветеран на десничарската Републиканска партија, имаше долга политичка кариера и имаше различни високи позиции, како во Франција, така и во ЕУ.
Сега ќе треба да формира влада која ќе треба да го „преживее“ Националното собрание поделено на три големи политички блока, од кои ниту еден не може да формира јасно мнозинство.
Политичарот и дипломат ги предводеше преговорите на Европската комисија за Брегзит со Лондон, откако Британија гласаше за напуштање на ЕУ во 2016 година.
Во оваа улога, тој го обезбеди договорот за Брегзит кој стапи на сила во 2019 година, по навидум бескрајните рунди преговори со неговите британски колеги.
Во 2021 година, тој беше назначен за специјален советник на претседателката на Европската комисија, Урсула фон дер Лајен.
Пред да се пресели во Брисел, Барние, меѓу другото, беше и министер за надворешни работи на Франција.
Пред три години Барние посочи дека сака да го предизвика претседателот Макрон на изборите, велејќи дека сака да ја ограничи и преземе контролата врз имиграцијата. На крајот не успеа да биде избран за кандидат од неговата партија.
Барние ќе биде најстариот премиер на Франција од формирањето на Петтата република во 1958 година.
Тој треба да го наследи Габриел Атале, најмладиот француски премиер досега, кој првпат беше назначен за премиер од претседателот Макрон на почетокот на 2024 година и кој ја извршуваше таа функција од јули.