7
Турскиот претседател Реџеп Таип Ердоган изјави денеска дека исламските земји треба да формираат сојуз против „растечката закана од експанзионизам“ што доаѓа од Израел.
Неговите коментари уследија откако палестинските и турските официјални лица изјавија дека израелските сили убиле турско-американка која вчера учествувала на протестите против проширувањето на населбите на Западниот Брег.
„Единствениот чекор што ќе ја спречи израелската ароганција, израелското варварство и израелскиот државен тероризам е сојузот на исламските земји“, рекол Ердоган на состанокот на здружението на исламските училишта во близина на Истанбул.
Тој, исто така, истакнал дека неодамнешните потези на Турција за подобрување на врските со Египет и Сирија се насочени кон „формирање линија на солидарност против растечката закана од експанзионизам“, за која тој тврди дека претставува закана и за Либан и за Сирија.
Ердоган беше домаќин на египетскиот претседател
Ердоган оваа недела беше домаќин на египетскиот претседател Абдел Фатах ал Сиси во Анкара. Тие разговарале за војната во Газа и начините за подобрување на одамна замрзнатите врски меѓу двете земји во првата ваква претседателска посета по 12 години.
Заладените односи меѓу двете земји почнаа да се подобруваат во 2020 година, бидејќи Турција започна дипломатски напори да ги намали тензиите со отуѓените регионални ривали, вклучувајќи ги Обединетите Арапски Емирати и Саудиска Арабија.
Израел започна истрага за инцидентот
Ердоган во јули рече дека Турција „во секој момент“ ќе упати покана до сирискиот претседател Башар ал Асад за можни разговори за обновување на односите меѓу двете соседни земји, кои ги прекинаа односите во 2011 година по избувнувањето на граѓанската војна во Сирија.
Израел веднаш не ги коментираше зборовите на Ердоган.
Израелската војска по инцидентот во петокот соопшти дека ги истражува извештаите дека еден странски државјанин „загинал во пукањето во областа и ќе се чекаат деталите за инцидентот и околностите во кои жената била усмртена“.