Во денешниот говор за буџетот за следната година во Бундестагот, германскиот канцелар Олаф Шолц ги предупреди своите сограѓани дека се соочуваат со „големи економски проблеми“.
Притоа тој се осврна на истражувањата од целата земја, а како причина за овие проблеми го посочи стареењето на работната сила. Затоа тој смета дека решението е во имиграцијата.
„Нема земја во светот со намалување на бројот на работоспособно население што има економски раст. Ова е вистината со која се соочуваме“, истакна Шолц.
Како одговор на овој проблем, тој потсети дека неговата влада ги поедноставила законските прописи за добивање државјанство и за квалификувани работници.
„Сакаме луѓето да доаѓаат овде да работат, да го научат германскиот јазик, да го почитуваат законот, да заработуваат за живот, но и да имаат право на глас“, рече тој.
Тој потсети и дека е потребно повеќе да се инвестира во инфраструктурата.
„За 10 години треба да вложиме милијарди евра во реконструкција на инфраструктурата затоа што се е запоставено со години. Ова се однесува на патиштата, мобилната телефонска мрежа и брзината на одобрување на индустриските капацитети“, посочи тој.