Полициската агенција на ЕУ, Европол денеска откри дека инспектори од над 30 земји разбиле огромна педофилска мрежа.
Како што велат, имале речиси два милиони корисници ширум светот и уапсиле 79 лица, кои не само што се осомничени дека гледале или преземале видеа со сексуална злоупотреба на деца, туку и некои од нив се осомничени дека активно учествувале во злоставување.
Околу 1.400 осомничени се идентификувани ширум светот.
Платформата, позната како Кидфликс, била отстранета од интернет под раководство на властите во Баварија.
Според Европол, ова била една од најголемите светски педофилски мрежи и ја означува најобемната операција против сексуална злоупотреба на деца во Европа досега.
Серверите на платформата со над 70.000 видеа биле затворени од германските и холандските власти на почетокот на март.
Истрагата почнала во 2022 година, но неодамна се интензивирала. Властите од 10 до 23 март конфискуваа илјадници електронски уреди и над 91.000 видеа.
Европол соопшти дека Кидфликс била основана од кибер-криминалци во 2021 година и станала една од најпопуларните платформи за педофили. На неа корисниците можеле да преземаат и емитуваат видеа кои прикажуваат сексуална злоупотреба на деца за одредена сума.