Обвинетиот Влатко Кешишев денеска даде исказ на судењето за грабнувањата и убиствата на Панче Жежовски и Вања Ѓорчевска. Тој изјави дека ги познава сите обвинети, освен Александар Ѓорчевски, таткото на Вања, кого, како што тврди, првпат го видел во судница.
Во сведочењето, Кешишев призна дека заедно со Велибор Манев копал дупка во Велес, но мислел дека бараат злато и не бил свесен за вистинската цел.
„Слушнав како разговараа за грабнување. На почетокот мислев дека се сериозни, но потоа поминаа две години и го сфатив тоа како фантазија. Не знам точно кој беше иницијатор, но разговорот обично го започнуваше Велибор“, изјави Кешишев.
Детали за вечерта на грабнувањето
На прашања од неговиот адвокат Дејан Ефремов, Кешишев потврди дека неколку пати бил во домот на Велибор Манев, заедно со Љупчо Палевски – Палчо. На прашањето за ранецот што се гледа на снимките од камерите на куќата на Манев, Кешишев одговори дека бил тегет, но не знае што имало во него.
„Тоа беше ранец на Палчо. Тој го носеше и го стави кај мене меѓу нозе во автомобилот. Јас не гледам во туѓи работи и не сум радознал. Само ако ми каже или ако ми нареди…“
Понатаму, Кешишев опиша како разговарале за Панче Жежовски и начини како да дојдат до неговата куќа.
„Кај Велибор се задржавме околу половина час, а потоа земавме токи-воки радио станици. Тројцата тргнаа кон куќата на Панче, а мене ме оставија да го земам Кангуто. Не ми дадоа моторола за комуникација. По половина час се вратија и рекоа дека ништо не направиле“, рече Кешишев.
Тој исто така опиша дека по неуспешниот прв обид, имало и втор обид за грабнување.
„Јас седев во Кангуто и чекав. По еден час се вратија со колата на Панче. Запаливме по една цигара, а Палчо го фрли телефонот на Панче“, сведочеше Кешишев.
Целта на грабнувањето
На прашање која била целта на разговорите за грабнувањето на Панче, Кешишев одговори:
„Првично, целта беше возилото. Човек што живее сам и што нема многу пари, за да бидат полесни околностите.“
Судењето продолжува со нови сведоштва и дополнителни испрашувања од страна на обвинителството и одбраната.