36
Реал Мадрид е најголемиот фудбалски клуб на планетата, а тоа го покажа и во реваншот од полуфиналето на Копа дел Реј кога се врати од 1:3 и преку продолженијата (4:4) одбрани водство од 1:0 од „Аноета“ и го елиминира Реал Сосиедад.
Карло Анчелоти уште еднаш покажа зошто важи за еден од најдобрите тренери на сите времиња. Неговата жестока расправија со Винисиус Жуниор во текот на натпреварот придонесе Бразилецот да се разбуди, кој покажа класа и му помогна на тимот да напредува.
„По тој момент го видовте најдоброто од Вини. Тој беше клучен фактор. Неговата асистенција ни донесе гол за 2:3, тој покажа дополнителна класа до крајот на натпреварот“, истакна Анчелоти.
Многу контроверзии предизвика ударот на Оласагасти кон Бразилецот, директно во коленото, поради кој не беше исклучен.
„За мене тоа беше црвен картон. Но Садија оцени дека тоа е старт за жолт картон, немам што да додадам повеќе“.
Го пофали младиот Ендрик, стрелецот на првиот гол, но и Арда Ѓулер.
„Ендрик одигра многу добро, пред се паметно, и тоа е она што го очекуваме од него. Тој е играч кој нема многу контакт со топката, но е многу ефикасен. Ако одигра 70 минути на ова ниво, доволно е. Ѓулер го направи тоа што се очекуваше од него за кратко време, асистираше за клучниот гол. Тој одлично ја чита играта“.
Целта беше остварена, но Анчелоти не заборави на критиките.
„Беше интересен натпревар, со многу голови и многу грешки. Ја постигнавме целта, повторно сме во финалето и немаме многу време за размислување бидејќи ни претстојат многу важни натпревари“, заклучи тренерот на Реал Мадрид.