0
Хуманитарниот фудбалски натпревар помеѓу ветеранските тимови на Бугарија и Македонија ќе се одржи на 27 април во 16 часот на стадионот Спартак во Варна. Ова го соопшти Фондацијата „Национали 94“, која го организираше настанот во партнерство со општина Варна. Сите собрани средства ќе бидат донирани за лекување на повредените во пожарот во дискотеката во Кочани.
На натпреварот, бугарската екипа ќе се вика „Ѕвездите од 94“ која ќе ја предводи бугарскиот селектор Димитар Пенев со неговиот помошник Красимир Борисов. Во неа ќе бидат вклучени голем број играчи кои завршија на четвртото место на Светското првенство во САД во 1994 година. Дел од бугарските легенди кои го потврдиле своето присуство се Христо Стоичков и Красимир Балаков, објавија дел од бугарските медиуми.
Македонската репрезентација ќе ја предводи нашиот најдобар фудбалер на сите времиња, Горан Пандев.
Во Бугарија беа згрижени 15 пациенти кои останаа повредени од трагедијата во Кочани. Исто така бугарскиот пратеник, Манол Пејков објави детали за распределбата на средствата што беа собрани за жртвите од трагичниот пожар. Според неговата објава на Фејсбук, по консултации со Кризниот штаб во Кочани, бил составен список од 18 семејства кои претрпеле најголеми загуби. Тој преку неговата фондација собра над 40000 евра за настраданите.