Несоодветно чување на одземените предмети со кои располага Агенцијата за управување со одземен имот и немање транспаретност во продажбата на недвижниот имот, одземените предмети и конфискуваниот имот, утврдиле ревизорите при контролата во оваа Агенција.
Анализите на ревизорите покажува дека чувањето и складирањето на одземените предмети и моторните возила не овозможуваат заштита на истите од уништување и губење на нивната вредност и дека дел од магацинските простории и плацеви што ги користи Агенцијата веќе 14 години се користат без одлука на Владата за пренесување на правото за користење.
За одземените предмети за кои Агенцијата нема услови веднаш да ги преземе во своите магацини, не се водела евиденција со податоци за видот на движниот имот и субјектот каде тие локациски се наоѓаат, ниту пак се вршел попис на истите. Заклучно со 31 декември 2023 година во царинските испостави се наоѓале 46, а во МВР 689 моторни возила без проценета вредност.
Утврдени се и слабости во спроведувањето на годишниот попис на средствата, побарувањата и обврските, како и неусогласувања на сметководствената евиденција со фактичката состојба утврдени со пописот.
Анализата на остварените приходи од продажбата на одземниот имот и уплатените средства во Буџетот на државата реализирани од Агенцијата во период од 2011 година до 30 септември 2024 година упатуваат дека од остварените вкупни приходи во износ од 1,650 милијарди денари, во Буџетот на државата уплатени се 1,205 милијарди денари, односно уплатени се помалку средства од 445 милиони денари.
Како неискористени парични средства на депозитната сметка на Агенцијата на 31 декември 2023 година се наоѓале 40.721 илјади денари, кои не се уплатени во Буџетот на државата.
Во однос на пресметувањето и исплатата на платите кон вработените, Агенцијата не располага со целосни и комплетни досиеја од кои може да се потврди дека утврдената плата е согласно нивните квалификации и искуство предвидени со актот за систематизација. На ревизорите не им бил приложен Правилник за плати и други надоместоци од 2009 година како доказ за исплатата на плати за 26 помошно-технички лица и документација за исплата на прекувремена работа.
Ревизорите утврдиле дека дел од расходите во износ од 1.168 илјади денари се евидентирани без истите да бидат потврдени дека се во рамки на лимитите утврдени согласно Упатството за користење на службените возила на Агенцијата и одлуките на Владата во однос на определување на корисници на службен мобилен телефон и за начинот на користење и висината на износот на средствата за угостителски услуги, без да биде обезбедена комплетна документација. Ревизорите исто така утврдиле дека поради слабости во начинот на спроведување и реализација на постапките за набавка на гориво, сервисирање на возила и канцелариски материјали, набавени се стоки во износ од 695 илјади денари за кои не се спроведени соодветни постапки согласно Законот за јавни набавки.