Претседателот на Европскиот совет Антонио Кошта денеска изјави дека царините наметнати од Соединетите држави треба да ја поттикнат Европа да постигне трговски договори со други партнери ширум светот. Откако американскиот претседател Доналд Трамп во средата воведе одмазднички тарифи од 20 отсто за стоките од ЕУ увезени во САД, Кошта на мрежата Х изјави дека ЕУ ќе продолжи да ја зајакнува својата трговска мрежа.
„Сега е вистинското време да се ратификуваат договорите со Меркосур, Мексико и решително да се придвижиме напред во преговорите со Индија и другите клучни партнери“, напиша тој, нагласувајќи ја важноста на слободната и фер трговија како основа на глобалниот просперитет.
Претседателката на Европската комисија Урсула фон дер Лајен претходно силно ги критикуваше новите царини, предупредувајќи дека тие ќе имаат „катастрофални последици“ за економијата и милиони луѓе ширум светот.
„Да бидеме јасни за огромните последици: глобалната економија ќе претрпи огромен удар, неизвесноста ќе расте, а мерките за заштита дополнително ќе се прошират“, објави Би-Би-Си.
Последиците ќе бидат ужасни за милиони луѓе ширум светот“, рече Фон дер Лајен, откако американскиот претседател Доналд Трамп во средата воведе одмазднички царини од 20 отсто за стоките од ЕУ увезени во САД.