Денеска главната железничка станица во градот Оснабрик, на северозападот од Германија е затворена, а околното подрачје евакуирано откако беа пронајдени четири бомби за кои се сомнева дека потекнуваат од Втората светска војна, соопшти националната железничка компанија Deutsche Bahn (DB).
Ограничувањата кои го засегаат меѓуградскиот, дневниот и товарниот сообраќај ќе останат на сила цел ден, а целото подрачје околу станицата е прогласено за зона на евакуација, најави DB. Околу 15.400 жители мораа да ги напуштат своите домови уште во раните утрински часови, откако сонди открија сомнителни бомби на местото на поранешната товарна станица, соопштија градските власти.
Ако се утврди дека бомбите не експлодирале, ќе бидат повикани експерти за нивна деактивација. Градот, кој се наоѓа околу 70 километри источно од холандската граница, веќе неколкупати спровел евакуација поради пронајдени бомби од Втората светска војна.
„Станицата беше масовно бомбардирана за време на војната како стратешка цел. Во голем дел од регијата воопшто не е извршено пребарување на теренот, па затоа таму се можни и понатамошни наоѓалишта“, објавија градските власти во февруари. На местото на поранешната товарна станица се гради ново станбено населба.