Соединетите Американски Држави им претставија на своите сојузници нацрт-предлог за мировен договор меѓу Русија и Украина, вклучувајќи рамковни услови за прекин на борбите и постепено ублажување на санкциите кон Москва во случај на траен прекин на огнот, пишува Блумберг.
Плановите на САД им беа претставени на европските сојузници и покрај предупредувањето од државниот секретар Марко Рубио, кој утринава рече дека администрацијата на Доналд Трамп е подготвена да „продолжи“ од мировните напори доколку наскоро нема напредок. Но потпретседателот Џеј-Ди Венс, говорејќи од Рим, рече дека останува „оптимист“ дека војната може да биде доведена до крај.
Според информациите од дипломатските кругови, американскиот план практично би ја замрзнал војната, а териториите под руска окупација би останале под Москва. Амбициите на Украина за членство во НАТО би биле симнати од масата. Официјалните лица одбија да дадат дополнителни детали, наведувајќи ја доверливата природа на разговорите.
Предлогот беше претставен на вчерашните средби во Париз, а меѓу нив беше и средбата на францускиот претседател Емануел Макрон и американскиот пратеник Стив Виткоф, како и одвоени консултации меѓу Рубио и советниците и преговарачите за национална безбедност од Франција, Германија, Велика Британија и Украина.
Блумберг претходно објави дека американските власти сакаат да постигнат целосен прекин на огнот во рок од неколку недели, а разговорите треба да продолжат следната недела во Лондон.