Американски војник загина во Босна и Херцеговина, каде што беше на одмор, јавија денеска локалните медиуми, откако беше завршена потрагата по жртвата, која траеше од вчера. Американски државјанин загинал на планината Маглиќ, на која бил во посета со сопругата. Станува збор за американски маринец кој се лизнал и паднал од ледена карпа во провалија длабока околу 500 метри, пишува Klix.ba.
Повикувајќи се на неименувани извори, порталот Дневни аваз наведува дека најверојатно се работи за припадник на американската армија кој служел во Италија. Спасувачките екипи веднаш по добивањето на пријавата ја започнале потрагата, но поради тешкотијата на теренот дури утрово успеале да го пронајдат телото на повредениот Американец.
Ненад Икониќ од Планинската спасувачка служба на Република Српска (ГСС) претходно изјави дека несреќата се случила на надморска височина од околу 2.200 метри, а во потрагата била ангажирана екипа на ГСС од 12 лица, со помош на полицијата и цивилната заштита.
Истрагата за оваа трагедија ја води Окружното обвинителство во Фоча, кое ќе ги испрашува сведоците. Станува збор за лица кои престојувале на Маглиќ кога починал мажот, државјани на Словачка и Русија.