18
Чаби Алонсо ќе го напушти Баер Леверкузен на крајот од сезоната и ќе се приклучи на Реал Мадрид, потврди германскиот „Скај“. Според нивните извештаи, раководството на минатогодишните шампиони на Бундеслигата е информирано за оваа одлука, а официјалната потврда би можела да дојде во текот на денот – на прес-конференција пред претпоследното коло од домашното првенство.
Долго време се шпекулираше за иднината на шпанскиот стручњак кој целосно го трансформираше Баер Леверкузен по неговото доаѓање. За две и пол години, тој ги водеше од 17-то место на табелата до првата шампионска титула во историјата на клубот и победа во Купот на Германија. Тие ќе играат во Лигата на шампионите две години по ред, а оваа сезона стигнаа до нокаут фазата.
Во текот на летото се подготвува големa тренерскa вртелешкa, каде што многу експерти можат да се најдат во нова средина. Карло Анчелоти е на работ да го напушти „кралскиот клуб“, а најтесно е поврзан со Бразил, каде што за прв пат во кариерата би тренирал репрезентација. Се шпекулира со три имиња како замена за Алонсо во Леверкузен, од кои секое има потенцијал да продолжи таму каде што застана Шпанецот.
Прв на листата е Ерик Тен Хаг, кој е без клуб откако доби отказ од Јунајтед. Во трка е и соиграчот на Алонсо од репрезентацијата – Сеск Фабрегас. Тој го однесе Комо во Серија А, каде што моментално се наоѓаат на 10-то место. Последниот кандидат е Оливер Глазнер, кој исто така импресионираше во Кристал Палас и има историја како тренер на германски клубови (Ајнтрахт и Волфсбург).
Едноставно чекаме „да падне првото домино“ за да започне оваа тренерска рокада. Се чини дека сè ќе започне со најавата за заминување на Анчелоти, а потоа и на Алонсо. Шпанецот е сè уште под договор со Леверкузен (до 2026 година), но тоа е најмалата пречка за комплетирање на трансферот – особено кога станува збор за Реал Мадрид.