Пакистанската војска објави дека Индија извршила напади врз неколку пакистански воени бази во текот на ноќта. Исламабад објави дека како одговор започнал голема воена операција наречена „Бунџанун Марсус“.
Пакистанската цивилна воздухопловна управа објави дека воздушниот простор на земјата ќе остане затворен во следните 24 часа, пренесува АФП.
Пакистанскиот премиер Шехбаз Шариф свика состанок на Националната команда во саботата, соопшти војската, откако Исламабад започна воена операција против Индија, насочена кон повеќе бази.
Ова највисоко тело од цивилни и воени функционери донесува безбедносни одлуки, вклучително и оние поврзани со нуклеарниот арсенал на земјата.
Тензиите меѓу нуклеарно вооружените соседи ескалираа оваа недела, откако двете страни се обвинија меѓусебно за нарушување на воздушниот простор со испраќање дронови и друга муниција, при што загинаа најмалку 48 лица.
Индиските власти го обвинија Пакистан дека користи суперсонични ракети за напад врз нивните воени бази, додека извештаи за смртни случаи, вклучувајќи го и еден висок функционер, доаѓаат од индискиот дел на Кашмир.
Портпаролката на индиската армија, полковник Софија Куреши, на брифинг утрово изјави дека Пакистан со овие ракети ги таргетирал индиските воздухопловни бази. Обвинението доаѓа неколку часа откако Исламабад објави дека Индија нападнала три пакистански воени бази со ракети, вклучувајќи една во близина на главниот град.
Мајорот на индиските воздухопловни сили, Вјомика Сингх, исто така се огласи, наведувајќи дека Пакистан извршил „агресивни дејствија користејќи повеќе закани истовремено“ на западната граница на Индија.
Според неа, Пакистан користел низа различни оружја, вклучувајќи дронови и оружје со долг дострел, за да ги гаѓа цивилните области и воената инфраструктура.
„Пакистанската армија, исто така, ги таргетираше воздушните институции со беспилотни летала и ракети со долг дострел по должината на линијата на контрола“, додаде Сингх.