„Кога станува збор за бесправната градба во Чаир, на сите веќе им е јасно зошто не зборуваат експонентите на Демократската унија за интеграција. И самиот нивен кандидат за Чаир, поранешниот министер за надворешни работи Бујар Османи, живее во објект изграден без дозвола и затоа тој нема морален капацитет да зборува на оваа тема.“
Со оваа директна изјава, првиот заменик-претседател на Владата и еден од лидерите на коалицијата ВЛЕН, Изет Меџити, упати жестока критика кон ДУИ и нејзиниот потенцијален кандидат за општина Чаир, Бујар Османи.
Во гостувањето во емисијата „Само Вести“ на телевизија Канал 5, Меџити изјави дека молкот на ДУИ по однос на обвинувањата за бесправни градби во Чаир не е случаен, туку намерен.
Според него, целата структура на ДУИ се крие зад националистичката и раздорна кампања на градоначалничката на Скопје, Данела Арсовска.
„Целата ДУИ се сокри зад Данела Арсовска и нејзината црна кампања против Чаир“, изјави Меџити.
Изјавите на Меџити претставуваат уште една остра конфронтација во пресрет на локалните избори, каде што Чаир се очекува да биде една од најжестоките политички битки меѓу ВЛЕН и ДУИ. (skopsko eho)