Во справувањето на пожарите од воздух на располагање се ставени двата „ер трактора“ на Дирекцијата за заштита и спасување и два полициски и два армиски хеликоптери. Третиот „ер трактор“ кој е на сервис, се очекува да биде вратен во земјава на почетокот на август.
Директорот на Дирекцијата за заштита и спасување Стојанче Ангелов денеска информираше дека кај овој „ер трактор“ дополнително се откриени дефекти.
– Во моментов имаме два „ер трактора“, третиот треба да биде вратен од сервис на почетокот на август. Фирмата која го работи сервисот, најверојатно се соочува со голем обем на работа и не може да постигне. Тој е благовремено однесен и веќе подолго време е таму, но дополнително кај него се откриени дефекти кои биле непредвидени поради што сервисот се развлекува подолго време, рече Ангелов на денешната прес-конференција.
Во случај на влошување на состојбата со пожарите, Ангелов посочи дека може да се побара и меѓународна помош, но дека во моментот тоа не е најсоодветната опција бидејќи и другите држави се справуваат со пожари.
– Во случај на драматично влошување на состојбата на располагање ни стои ЕУ механизмот за заштита и спасување и во кој било момент може да побараме меѓународна помош, но морам да укажам дека целиот регион е во оган. Од моите билатерални контакти со колегите од регионот можам да кажам дека сите летала од соседните држави се зафатени со гаснење на пожарите во нивните држави, така што и варијантата на барање на меѓународна помош во летала не е најсоодветната опција, рече Ангелов.
Додаде дека бројот на пожари во земјава е висок, но смета дека досега е доста успешно справувањето со нив.
Секое утро, како што изјави, авион на Агенцијата за цивилно воздухопловство прави прелет на територија на целата држава со цел да се добијат информации за состојбата со постојните пожари и за нови пожари.
– Добар дел од пожарите се ниски пожари, така што од еколошки аспект на некои места штетата и не е толку голема, но факт е дека борбата со пожарите е тешка бидејќи сите пожари се на тешко пристапни места, а дел и на целосно непристапни терени поради што воздушната поддршка е од исклучително значење, рече Ангелов.
Упати апел до сопствениците на викендици или куќи да ги исчистат дворовите од вегетација и да направат заштитен појас.
Според него, продолжуваат и обидите за намерно предизвикување пожари на отворен простор укажувајќи на најновиот откриен случај во општина Крива Паланка каде се пронајдени повеќе од 30 расфрлени гуми, гранки и картонски кутии.
-За жал, секојдневно добиваме индиции за намерни палежи коишто јавно ги објавуваме, но во некои случаи тешко оди собирањето на докази, рече Ангелов.
Тој воедно апелираше до граѓаните доколку видат сомнителни случаи да ги пријават на телефонскиот број 112 или во најблиската полициска станица.
Вкупно 21 пожар на отворен простор од кои шест активни, четири под контрола и 11 изгаснати, се евидентирани до 18:30 часот попладнево.
Како што информира Центарот за управување со кризи (ЦУК), активни се пожарите во Општина Василево, Радовиш и Берово – с. Нивичино, планините Голем Готен и Малешевските планини (нискостеблеста шума, смрека, грмушки и ниска вегетација), во Општина Чучер Сандево – кај Делеководите (шума), во Општина Прилеп – с. Бешиште, место викано Бешишки Рид (мешана шума), во Општина Желино – помеѓу селата Церово и Групчин (нискостеблеста и деградирана шума), во Општина Теарце – с. Теарце (ниска вегетација) и во Општина Штип – с. Драгоево и с. Селце (нискостеблеста шума – прнар и сува трева).
Под контрола се пожарите во Општина Прилеп – помеѓу с. Царевиќ и с. Смолани, место викано Радобилски Рид (мешана шума и нискостеблеста вегетација), Општина Македонски Брод – с. Латово, м.в. Маркова Стапалка (грмушки и сува трева), Општина Македонски Брод – с. Грешница (мешана шума и сува трева) и во Општина Македонски Брод – помеѓу с. Локвица и с. Крапа (деградирана дабова шума, грмушки и ниска вегетација).
Според ЦУК, изгаснати се пожарите во Општина Битола – с. Ново Лагово (ниска вегетација), Општина Демир Капија – кај тунелите на автопатот Е-75 (ниска вегетација), Општина Дебар – с. Рајчица (нискостеблеста шума), Општина Боговиње – с. Пирок (ниска вегетација), Општина Новаци – с. Српци и с. Могила (ниска вегетација), Општина Куманово – нас. Средорек (ѓубре), Општина Куманово – нас. Средорек (ѓубре), Општина Куманово – нас. Карпош, ул. 154 (ниска вегетација), Општина Куманово – ул. Никола Тесла (ниска вегетација), Општина Охрид – ул. Ариф Мустафа (ниска вегетација) и Општина Охрид – ул. Стив Наумов, место викано Тумба (ниска вегетација).