0
Австралискиот тренер Дарен Кејхил нема да биде дел од тимот на Јаник Синер на претстојното Отворено првенство на САД во Њујорк.
Човекот кој е во голема мера заслужен за напредокот на италијанскиот тенисер ќе го пропушти Отвореното првенство на САД, каде што Синер ќе ја брани титулата, објави „Ла Република“.
Порано стана познато дека играчот број еден во светот го вратил во својот тим фитнес тренерот Умберто Ферара, кој работеше со него од мај 2022 до септември минатата година. Тие ја прекинаа соработката по скандалот со употребата на клостебол.
Кејхил е во тимот на Синер од 2022 година, а кога неодамна го победи Карлос Алкараз во финалето на Вимблдон, сите нагласија дека влијанието на Австралијанецот било клучно. Затоа, веста дека тој нема да биде присутен на Отвореното првенство на САД предизвикува сериозна загриженост кај навивачите и експертите.
Отвореното првенство на САД започнува на 24 август, а финалето е на 7 септември.