0
Државниот секретар на САД, Марко Рубио, денес изјави дека САД сакаат добри односи со Пекинг, но дека Вашингтон „секогаш ќе ги брани своите интереси“.
„Соединетите Американски Држави и Кина се двете најмоќни и најважни земји во светот. Затоа мора да имаме однос. Мора да можеме да разговараме со нив и мора, доколку е можно, да најдеме области на соработка… Сакаме да имаме почитувачки однос со нив. И во оние области каде што не се согласуваме, секогаш мора да бидеме на американска страна“, рече Рубио во интервју за Фокс њуз.
Тој оцени дека економската нерамнотежа меѓу САД и Кина е еден од главните проблеми, истакнувајќи дека американскиот претседател Доналд Трамп се обидува да ја ребалансира оваа размена.
„Мислам дека кога зборуваме за трговската перспектива, сите треба да го разберат ова, 30 години Кинезите во основа ја водат оваа економска шема или операција каде што можат да продадат што сакаат на САД“, рече Рубио.
Трамп губи трпение чекајќи Русија да преземе чекори за прекин на конфликтот
Рубио изјави и дека претседателот на Соединетите Американски Држави, Доналд Трамп, губи трпение со конфликтот во Украина, чекајќи чекори од руската страна за прекин на војната.
„Мислам дека тој станува сè повеќе фрустриран што, и покрај многу добрите контакти со рускиот претседател Владимир Путин во телефонските разговори, тоа никогаш не води кон ништо. Затоа е време за некаква акција тука, и мислам дека претседателот го стави тоа јасно до знаење. Тој губи трпение. Тој ја губи подготвеноста да продолжи да чека руската страна тука да направи нешто за да ја прекине војната“, рече Рубио во интервју за Фокс њуз.
Тој нагласи дека војната во Украина не е војна на Трамп, туку дека американскиот претседател „сака да ја види завршена“.
„Тоа не е негова војна. Тој не ја започна оваа војна. Таа не се случи и никогаш немаше да се случи – ако беше претседател, но се случи. Тој ја наследи и направи сè што е можно за да ја заврши“, рече државниот секретар на САД.