Со 19 воздушни средства и копнени сили, грчките пожарникари експресно го ставија под контрола големиот пожар што избувна во близина на универзитетскиот кампус во атинската населба Зографу на мала оддалеченост од центарот на градот, а од бројот 112 за итни случаи беше испратена порака до оние кои се во областа да бидат во состојба на готовност, јави дописничката на МИА од Атина.
Пожарот гореше ниска вегетација и интервенираа 110 пожарникари со пет пешадиски тима 30 возила, волонтери и цистерни од општината, како и 11 авиони и осум хеликоптери од кои еден за координација, со што беше изгасен и не беше потребна евакуација на граѓаните.
Во Грција и понатаму се активни пожарите во Кожани и на островот Китира, каде што денеска имаше нови разгорувања.
На Китира беа испратени две пораки од бројот 112 за евакуација на сите оние кои се наоѓаат во близина на две населени места.
Пожарот на Китира е активен од саботата, а според податоците од Националната опсерваторија во Атина и порталот Метео, заклучно со вчера напладне изгореле 2.680 хектари.
Во пожарите во саботата во близина на Атина и на островот Евија изгореле 1.280 хектари.