11
Американскиот претседател Доналд Трамп денес објави дека ќе воведе царини за Русија за 10 дена ако Кремљ не се согласи да ја заврши војната дотогаш, според аудио-снимка објавена од Белата куќа.
Се очекува царините што ги спомена Трамп да бидат секундарни санкции за земјите што купуваат руска нафта, гас и други производи, како што се Кина и Индија.
„За 10 дена од сега. Потоа ќе воведеме царини и слични работи. Не знам дали тоа ќе влијае на Русија, бидејќи тој (рускиот претседател Владимир Путин) очигледно сака да ја продолжи војната, но ние ќе воведеме царини и слични работи“, рече Трамп како одговор на новинарско прашање пред да се качи во авион.
На 14 јули Трамп го предупреди Путин дека САД ќе воведат високи царини до 100 проценти ако Русија не се согласи на мировен договор во Украина во рок од 50 дена. Тој објави дека повеќе не е подготвен да чека толку долго.