Поставена спомен-плоча кај мостот на Бит Пазар, во чест на четворицата жртви и преживеаните од трагичниот настан на Бит Пазар од ноември 1992 година – момент со особена тежина во историската меморија на нашиот град.
„На овој комеморативен чин имав чест да бидам заедно со Првиот заменик претседател на Владата, г. Изет Меџити, институционални претставници, семејства на жртвите и граѓани, кои со своето присуство ја претворија оваа пригода во симболичен повик за достоинство и сеќавање“, објави градоначалникот на Чаир, Висар Ганиу.
По церемонијата, одржаа симболичен марш кон Албанскиот театар, каде што беа претставени документарни фотографии од настанот, како дел од пошироката заложба за зајакнување на колективната меморија.
Во подготовка е и научната публикација „Вистината за настаните на Бит Пазар – 1992“, која ќе понуди студиски пристап кон настан кој сè уште недоволно е третиран во јавниот и институционалниот дискурс.
„Почит за жртвите. Почит за преживеаните. Сеќавање за генерациите што доаѓаат“, објави Ганиу.