8
Словенија вчера воведе ембарго за извоз, увоз и транзит на оружје во Израел, објави државната новинска агенција СТА, повикувајќи се на владино соопштение.
Мерката ја објави премиерот Роберт Голоб по седницата на Владата. Голоб рече дека Словенија е првата европска земја што направила таков чекор, објави СТА.
Словенија претходно прогласи двајца израелски министри за непожелни. Станува збор за министерот за национална безбедност Итамар Бен-Гвир и за министерот за финансии и одбрана, Безалел Смотрич, кои словенечката влада ги назначи како лица кои „поттикнуваат екстремно насилство и сериозни кршења на човековите права врз Палестинците со нивните геноцидни изјави“.
Словенија ја призна палестинската држава во јуни минатата година и оттогаш постојано повикуваше на прекин на огнот во Газа и зголемување на испораките на помош.
Од друга страна, Израел ги осуди последните изјави на Франција, Велика Британија и Канада за можно признавање на Палестинска држава, велејќи дека трите земји ќе го наградат Хамас за нападот врз израелската територија на 7 октомври 2023 година.
Претходно вчера американскиот специјален претставник Стив Виткоф се сретна со израелскиот премиер Бенјамин Нетанјаху во обид да ги спаси преговорите за примирјето во Газа и да ја реши хуманитарната криза.