7
Клучен советник на американскиот претседател Доналд Трамп во неделата ја обвини Индија дека придонесува за финансирање на војната во Украина преку купување на руска нафта, откако Трамп дополнително го зголеми притисокот врз Њу Делхи да го прекине ова.
„Она што Трамп јасно го порача е дека не е прифатливо Индија да продолжи да го финансира овој воен конфликт со купување нафта од Русија“, изјави Стивен Милер, заменик шеф на кабинетот на Белата куќа и еден од највлијателните советници на Трамп.
Изјавите на Милер спаѓаат меѓу најострите критики кои досега ги упатила Трамповата администрација кон една од своите клучни партнери во Индо-Пацифичкиот регион.
„Ќе бидете шокирани кога ќе дознаете дека Индија е речиси на исто ниво со Кина според количината купена руска нафта. Тоа е запрепастувачки факт“, рече Милер во емисијата Sunday Morning Futures на Fox News.
Извори од индиската влада за Reuters изјавија во саботата дека Индија нема намера да престане со купување руска нафта, и покрај заканите од САД.
Во петокот стапи на сила царина од 25 проценти на индиски производи како последица на купувањето воена опрема и енергенси од Русија.
Трамп дополнително се закани дека ќе воведе царини од 100 проценти на увозот од земјите кои ќе продолжат да купуваат руска нафта, освен ако Москва не постигне мировен договор со Украина.