„Македонците во Куманово беа испровоцирани од албанскиот етнички шовинизам! Од изјавите на Ахмети со потценување и навредувачки тон кон светиот празник Илинден! Тие не се насилници, ниту мразачи!“, пишува на својот Фејсбук профил лидерот на Македонски концепт, Петар Богојески, коалицискиот партнер на премиерот Христијан Мицкоски, во однос на националистичките скандирања на кошаркарскиот натпревар меѓу Северна Македонија и Романија на 2 август во Куманово.
„Слични навреди никогаш не завршија со кривични пријави против албанските навивачи, за разлика од последниот случај во Куманово, каде обвинителството веднаш реагираше за навредите насочени кон Албанци. Денес, македонските навивачи стануваат жртва на лов на вештерки, само затоа што имаат љубов кон Македонија! Ако навредите на една етничка заедница се гонат, тогаш МОРА да се гонат и сите други. Или – никој. Македонските млади не се криминалци! Тие се гласот на една потценета генерација што уште верува во сопствената земја! Да не се срамиме што сме Македонци. Да не се плашиме што сме гласни. Доста со двојните аршини!“, истакна меѓудругото Богојески.
Ваква релативизирачка порака на Богојески, без осуда за говорот на омраза на навивачите во Куманово, следува неколку часа подоцна откако премиерот Мицкоски го осуди тој немил инцидент, потенцирајќи дека не го ни слушнал тоа националистичко скандирање од една мала група навивачи.
Богојески „му држеше грб“ на Мицкоски додека го осудуваше тој немил настан. Но, осудата не допре до него иако беше само на еден метар одалеченост од премиерот…
ЦМДТ
Преземено: Цивил Медиа