Зголемен број пациенти со убоди од инсекти, информираа денеска од општа болница Куманово. Пациентите бараат помош за реакции по каснување од комарци, но не се исклучени и случаи со убоди од крлежи. Здравствените работници апелираат на зголемена претпазливост, особено во летниот период кога ризикот е зголемен. Од кожното одделение посочуваат дека во последните недели зголемен е бројот на граѓани кои бараат стручни совети за кожни реакции. Најчести се симптоми од алергиска природа, кои доколку не се смират со антиалергиска терапија или локален антихистаминик, треба да се третираат под надзор на лекар.
Според дерматовенерологот и началник на одделот, д-р Лилјана Пандиловска, најранливи се децата, кои поради интензивното чешање често предизвикуваат секундарни инфекции на кожата.
– Секојдневно имаме случаи, особено кај мали деца кои не можат да се смират од чешањето. Тоа води до појава на црвенило, отоци, па дури и бактериски инфекции. Родителите се вознемирени бидејќи децата не спијат, а воспаленијата изгледаат сериозно, изјави д-р Пандиловска.
Во летниот период, облеката е исто така клучен фактор за заштита. Препораките се да се носи светла, лесна гардероба од природни материјали, обувки за да се избегне непосреден контакт со инсекти и за полесна видливост.