5
Израелскиот премиер, Бенјамин Нетанјаху денес порачал дека целта на земјата е да го ослободи Појасот Газа, а не да го окупира, и дека најдобриот начин да се стави крај на војната е разоружување на милитантната исламистичка група Хамас.
„Хамас сè уште има илјадници вооружени терористи во Газа, кои крадат храна и пукаат во цивили. Ниту една нација не може да ја одобри работата на геноцидна терористичка организација“, изјавил Нетанјаху пред новинарите.
Тој додал дека војната во Појасот Газа, која трае од октомври 2023 година, би можела да заврши утре ако Хамас се разоружа и ги ослободи сите преостанати заложници.
Нетанјаху навел пет принципи за завршување на војната, кои вклучуваат предавање, односно разоружување на Хамас, ослободување на сите израелски заложници, безбедносни контроли, демилитаризација на Појасот Газа и воспоставување неизраелска, мирна цивилна администрација.
Премиерот соопштил дека цивилната администрација ќе функционира како преодна влада и дека веќе има неколку кандидати за неа, кои не ги именуваше.
„Со оглед на тоа што Хамас не сака да се разоружа, Израел нема друг избор освен да ја заврши работата за негово покорување“, рекол Нетанјаху, додавајќи дека Ерусалим моментално контролира 75 проценти од територијата на Појасот Газа.
Тој навел дека кабинетот за безбедност ѝ наредил на израелската армија да ги демонтира двете преостанати упоришта на Хамас, во градот Газа и камповите во централниот дел од Појасот.
„Тоа е најдобриот начин да се заврши војната“, посочил израелскиот премиер.
Нетанјаху информирал за недостатокот на хуманитарна помош што стигнува до цивилите во Газа дека, од почетокот на војната, Израел испратил околу два милиони тони помош за населението во погодените области.
„Не знам за друга армија што дозволила толку многу помош за цивилите во војна“, рекол тој, додавајќи дека, и покрај пречките на Хамас, два милиони Палестинци моментално имаат пристап до помош.
Нетанјаху тврди дека странските медиуми, кои имаат ограничен пристап до теренот во Појасот Газа, ги користат тврдењата, статистиката и фотографиите на Хамас во своето известување.
„Пред два дена решивме да им дозволиме на странските новинари да влезат во Појасот Газа. Тоа е ризично, но мислам дека може да се изведе безбедно. Таа директива наскоро ќе биде спроведена. Ќе видите жители на Газа кои се борат со членови на Хамас“, соопштил тој.
Нетанјаху истакнал и дека целта на Израел е да ги врати во земјата 20-те преостанати живи заложници, како и мртвите.
Кога бил запрашан за прекинот на испораките на германско оружје за Израел, Нетанјаху објаснил дека канцеларот на земјата, Фридрих Мерц, подлегнал на притисокот од странските медиуми.
На прашањето дали признавањето на палестинската држава е награда за Хамас, Нетанјаху вели дека на Палестинците неколку пати им е понудена сопствена држава, но дека тие одбиле.
„Палестинците не се загрижени за создавање држава, туку за уништување на држава“, оценува тој, констатирајќи дека во израелскиот Кнесет, на гласањето за постоењето на палестинската држава, 99 пратеници гласале против, а девет гласале за нејзино формирање.
„Нема да извршиме национално самоубиство“, заклучил Нетанјаху.