5
Смутито може да биде здрав појадок или ужина, но често се случува гладот брзо да се врати. Експертите нагласуваат дека клучот не е само што пиете, туку и како го подготвувате.
Според нутриционисти, една од најдобрите состојки што можете да ги додадете во смутито, а која помага при слабеење, се чиа семките. Тие се речиси безвкусни, лесни за додавање во блендер и содржат здрави масти, влакна и протеини кои го продолжуваат чувството на ситост, пишува EatingWell.
Влакна што го продолжуваат чувството на ситост
Две лажици чиа семки содржат дури десет грама диетални влакна, што е реткост во толку мал дел. „Влакната го забавуваат варењето и ви помагаат да се чувствувате сити подолго време, што може да го намали грицкањето и вкупниот внес на калории“, нагласува нутриционистката Елиза Витакер.
Тие се особено богати со растворливи влакна, кои апсорбираат вода и се шират во желудникот, создавајќи чувство на ситост. Нутриционистката Ешли Хок додава дека ова помага да се намали прејадувањето и несвесното посегнување по храна. Студиите покажаа дека редовната консумација на чиа семки може да го намали обемот на половината и нивото на Ц-реактивен протеин, маркер на хронично воспаление во телото.
Извор на здрави омега-3 масти
Чиа семките се одличен растителен извор на омега-3 масни киселини. Една лажица содржи околу 1,3 грама, што е речиси целата дневна потреба за жените и повеќето за мажите. „Омега-3 мастите го забавуваат варењето, го продолжуваат чувството на ситост и можат да го забрзаат метаболизмот“, објаснува Витакер.
Некои истражувања покажуваат дека омега-3 масните киселини можат да ја зголемат базалната метаболичка стапка, што значи дека телото согорува повеќе калории дури и во мирување, пишува Eating Well.
Растителни протеини за стабилна енергија
Две лажици чиа семки обезбедуваат речиси пет грама протеини. Комбинацијата од влакна, протеини и здрави масти го одржува нивото на шеќер во крвта стабилно, што спречува ненадејни падови на енергијата и напади на глад. „Стабилниот шеќер во крвта е клучен за контрола на апетитот во текот на денот“, забележува Хок.
Малку калории, многу хранливи материи
Покрај тоа што се богати со хранливи материи, чиа семките се исто така ниски во калории – околу 140 калории во две лажици. Тие содржат протеини, омега-3 масти, витамини и минерали, а воедно се достапни и долготрајни. „Една кесичка трае долго време, а поради малата големина на порцијата, лесно се вклопуваат во вашата исхрана“, додава нутриционистката Рајан Гајгер.
Како да ги додадете во смути?
Чиа семките се исклучително лесни за употреба. Препорачливо е да се започне со една до две лажици дневно и постепено да се зголемува количината за да се навикне телото на поголемиот внес на влакна. За покремаста текстура, можете да ги потопите десет минути пред блендирање, или за погусто смути, додадете ги непосредно пред тоа и оставете ги да се згуснат. Достапни се и во мелена форма за оние кои сакаат целосно мазни пијалоци.