4
За прв пат од 2015 година, Европската радиодифузна унија (EBU), во соработка со британското студио за брендирање PALS, го редизајнираше генеричкото лого на Евровизија. Сега е во нов, адаптиран фонт, Singing Sans, а почетната буква „e“ повеќе не се пишува со голема буква.
„Евросонг отсекогаш бил приказна за еволуција, музички, културно и креативно. Ова ребрендирање оддава почит на 70 неверојатни години, а истовремено го носи брендот во возбудлива иднина. Тој е смел, разигран и полн со срце, исто како и самото натпреварување. Горди сме што му го претставуваме на светот“, рече Мартин Грин, директор на Евросонг.
Најавувајќи нови изненадувања во наредниот период, Грин нагласува дека може да се очекуваат детали за активностите што прославуваат 70 години од Евровизија, или седум децении од ерата „Обединети од музиката“. Судејќи според коментарите, гледачите не се воодушевени од оваа промена.
„Честитки до оној што го направи ова лого, но со добра намера ви велам да се вратите на старото лого“, „Ова ми изгледа како Canva или вештачка интелигенција, не на добар начин“, „Ова не е Disney Channel или детско натпреварување, вратете го старото лого“, „Изгледа како дете да си играло“, се некои од коментарите.
За потсетување, благодарение на победата на Џеј-Џеј во Базел 2025 со песната „Wasted Love“, изборот на новата најдобра европска песна ќе се одржи во Австрија следната година. Организаторите открија дека планираат музичкиот натпревар во 2026 година да „се фокусира на минатото, да ја слави сегашноста и заедно да гледаме кон иднината“.