Дел од граѓаните се задолжуваат, а дел штедат пари на сметка во банка. Податоците на Народната банка покажуваат дека во јули годинава има годишен раст од 13 проценти и на кредитите и на депозитите. Вкупните кредити во домашните банки во јули достигнаа над 8,54 милијарди евра. Граѓаните се задолжени со вкупно 4,3 милијарди евра, а речиси исто толку 4,2 милијарди е задолжувањето преку кредити на компаниите.
„Во јули 2025 година, вкупните кредити забележаа месечен раст од 0,6%, како резултат на зголеменото кредитирање на двата сектора, коешто е поизразено кај секторот „домаќинства“. Годишниот раст изнесува 13,0% и се должи на повисоките кредити на двата сектора, со поголем придонес на корпоративниот сектор“, велат од НБРМ.
Податоците на Народната банка покажуваат дека од 4,3 милијарди евра колку што се задолжени граѓаните во банки, најголем дел – половината или 2,21 милијарди евра се за потрошувачки кредити, 1,66 милијарди евра за станбени кредити. Останатото задолжување е за автомобилски кредити, на кредитни картички и негативни салда по тековни сметки.
И овој месец граѓаните најмногу се задолжувале со потрошувачките и станбените кредити, кај кои е забележан месечен раст од 1%,додека на годишно ниво кај потрошувачките кредити зголемувањето е од 9,8%, а кај станбените 15,3%.
На другата страна пак се заштедите. Вкупните депозити достигнаа 10 милијарди евра, од кои 6,76 милијарди евра се заштеди на домаќинствата, а 2,87 милијарди се заштедите на компаниите.
„Во јули, вкупните депозити остварија месечно и годишно зголемување од 0,6% и 13,0%, соодветно. Притоа, месечната и годишната промена во поголем дел се должи на растот на депозитите на секторот „домаќинства“, при помал раст и на депозитите на корпоративниот сектор“, велат од Народна банка.
Годишниот раст на заштедите на домаќинствата е 13,3 проценти, а на корпоративниот сектор 14,5 проценти.