12
Рускиот министер за надворешни работи Сергеј Лавров во неделата ги изложи клучните услови на Русија за постигнување мир во Украина, предлагајќи безбедноста на земјата да биде гарантирана од група нации во кои би биле вклучени постојаните членки на Советот за безбедност на ОН, објави Ројтерс.
Во интервју за американската NBC News, Лавров откри дека прашањето за безбедносните гаранции го разговарале рускиот претседател Владимир Путин и американскиот претседател Доналд Трамп, при што Путин потсетил на неуспешните разговори одржани во Истанбул во 2022 година.
Според нацрт-договорот што го видел Ројтерс, во разговорите се дискутирало за трајната неутралност на Украина во замена за безбедносни гаранции од петте постојани членки на Советот за безбедност на ОН – Велика Британија, Кина, Франција, Русија и САД, со учество на други држави. Лавров сега прецизира дека, покрај членовите на Советот за безбедност, во оваа група гаранти би можеле да бидат вклучени и Германија и Турција.
Според Лавров, моделот е јасен. „И гарантите би ја гарантирале безбедноста на Украина, која мора да биде неутрална, која не смее да биде поврзана со никаков воен блок и која мора да биде ненуклеарна“, рече тој, според транскриптот објавен од руското Министерство за надворешни работи.
Притоа, тој уште еднаш нагласи дека членството на Украина во НАТО е неприфатливо за Русија. Покрај тоа, тој истакна дека Москва сè уште бара заштита за оние кои говорат руски јазик во Украина и дека е потребно да се водат територијални дискусии.
Овие услови се во согласност со претходните извештаи, според кои Путин бара Украина да го предаде целиот источен регион Донбас, да се откаже од амбициите за НАТО, да остане неутрална и да не дозволи присуство на западни трупи на нејзина територија.