Министерството за локална самоуправа ќе формира ресурсен центар составен од различни експерти, за да им помогне на руралните општини кои немаат доволно човечки ресурси. Министерот Златко Перински изјави дека овој експертски тим ќе се ангажира во неколку области каде што има недостиг од вработени за извршување на административни и технички услуги за граѓаните.
„Ова ќе биде тело што ќе започне да се интегрира врз основа на проекти и потоа ќе го анализираме во рамките на Министерството за локална самоуправа. Една од активностите на ресурсниот центар ќе биде можноста општините, во зависност од своите ресурси и надлежности, да побараат помош и поддршка од експерти за надминување на проблеми во моменти кога немаат човечки капацитет за тоа“, изјави Златко Перински, министер за локална самоуправа.
Перински објасни дека центарот е формиран на барање на општините, кои немаат доволно човечки ресурси, па овој тим ќе одговара на дневна основа на техничките и административните барања на граѓаните кои не можат да се исполнат од постојниот општински кадар.
„Во изминатиот период се соочивме со проблем кој најмногу се јавуваше во малите рурални општини. Нема да кажам која, но имаше општина што не можеше да го изготви буџетот за следната година, бидејќи во тој момент немаше соодветен кадар. Единствениот вработен што го имаа беше отсутен поради боледување или други причини, не се сеќавам точно, и тука требаше ние да интервенираме преку испраќање експерти за да помогнеме во општинската администрација за надминување на тие предизвици“, изјави Златко Перински, министер за локална самоуправа.
Перински рече дека центарот треба да се замисли како институционален механизам, кој ќе овозможи долгорочна, одржлива и стручна поддршка за општините.