Претседателката на државата, Гордана Силјановска-Давкова, смета дека нема потреба од нова декларација за црвените линии на државата за евроинтеграциите, која опозициската партија СДСМ најави дека ќе ја достави.
Силјановска-Давкова од Охрид им порача на сите политички партии да седнат во Собранието и да се договорат како ќе настапуваат надвор од државата.
Според претседателката, најважно е партиите – и од опозицијата и од власта – да постигнат консензус за тоа како ќе се однесуваат во меѓународен контекст.
„По толку многу бели линии, сега да зборуваме за црвени линии е апсурдно. Имаме декларација, и тоа не една, туку неколку декларации усвоивме во Собранието и тие не се почитуваа. Дури ни резултатот од референдумот не го почитувавме, а камоли црвените линии. Не разбирам што значи црвена линија во овој правец, особено не го разбирам аргументот дека ако соседот сепак стави вето, ние ќе ги прекинеме преговорите. Па ќе ги прекинеме разговорите и тоа ќе му одговара на соседот, но ќе го менуваме Уставот по 37-ми пат“, вели претседателката на државата, Гордана Силјановска Давкова.