18
Активната улога на Бугарија во НАТО и колективната одбрана е гаранција за нашата национална безбедност и за зголемување на нашите одбранбени капацитети, изјавил премиерот на Бугарија, Росен Жељазков за време на средбата со заменик-генералната секретарка на НАТО, Радмила Шекеринска. За време на нивниот разговор во Министерскиот совет во Софија, тамошниот премиер истакнал дека нивната земја се придржува до сите одлуки од Самитот во Хаг, каде што лично учествувал Жељазков, како што е зајакнување на одвраќањето и одбраната на Источното крило, особено во Црното Море, зголемување на инвестициите во одбраната, продолжување на нашата колективна поддршка за Украина и зајакнување на нивните партнерства.
„Бугарија е секогаш меѓу сојузниците во Алијансата, кои со своите доследни активности го одржуваат и зајакнуваат своето единство“, рекла Шекеринска. „Вашата земја има исклучителен потенцијал за развој на одбранбената индустрија, а најновите иницијативи поврзани со механизмот SAFE, како и неодамна објавениот договор со Rheinmetall, се индикативен пример во оваа насока“, нагласила таа.
Жељазков истакнал дека Бугарија веќе достигнала над 2% од БДП во трошоците за одбрана и постои политички консензус за постепено зголемување до 5% од БДП до утврдениот рок 2035 година.
Премиерот ги истакнал напорите на Бугарија за зајакнување на одвраќачката и одбранбена позиција на НАТО на источното крило и во регионот на Црното Море. Како добар пример за успешна соработка со сојузниците, Жељазков ја посочил мултинационалната борбена група на нивна територија со Италија како водечка нација и придонесите од неколку сојузнички земји, вклучувајќи ја и Македонија. Покрај тоа, Работната група за контрамерки против мини на Црното Море даде значаен придонес во обезбедувањето на безбедноста и слободата на пловидбата.
Во однос на регионалната безбедност, вклучително и воената мобилност на НАТО и ЕУ, Жељазков ја навел важноста на Коридорот 8, кој го поврзува Јадранското Море од Италија преку Албанија, Македонија, до Бугарија на Црното Море. Овој проект е исто така од витално значење за економскиот раст на поширокиот регион, вклучително и Западниот Балкан, рече премиерот, и очекува сојузниците да ја одиграат својата улога без одложување.
За време на средбата со Шекеринска, Жељазков изразил загриженост за тековната нестабилна безбедносна ситуација во Западен Балкан, одбележана со политичка поларизација, меѓуетнички тензии и институционални дефицити – сите тие се дополнително влошени од малигно влијание и хибридни активности од надворешни актери, додал тој. Премиерот бил категоричен дека е од клучно значење да се зајакне стратешката комуникација и преку НАТО и на билатерален начин. Железков нагласил дека Бугарија е сериозно посветена на мирот во регионот и ќе продолжи со својот придонес во КФОР и ЕУФОР-Алтеа.