7
Лидерот на Алијансата за иднината на Косово, Рамуш Харадинај, реагираше на изјавата на Албин Курти во врска со Уставниот суд, велејќи дека „болно е кога сегашниот премиер и оној што се стреми повторно да биде на таа позиција, не ја признава највисоката институција на правдата во својата земја и ја напаѓа толку жестоко и толку ниско“.
„Ова ме потсетува на онаа народна изрека – „кога крадецот вика, фатете го крадецот“!“, напиша Харадинај на Фејсбук.
Тој додаде дека е болно што Курти не зборува за „постојаните кршења на Уставот“ за кои тврди дека ги извршиле Курти и неговата партија, туку се обидува да ја измами јавноста претставувајќи дека судиите на Уставниот суд се виновни.
„Тие судии ги избра легитимниот парламент на Косово, а не неговите имагинарни формации“, напиша Харадинај.
Според него, вистината за блокадата на Косово има само едно име, а тоа е Курти.
„Вистината за блокадата, не само на парламентот, туку и на самата држава, има само едно име, а тоа е Албин Курти, и тоа денес им е јасно на сите, освен во умот на Курти каде што е замаглено. Затоа е крајно време највисоката судска институција во земјата во своите толкувања на прекршувањата на Уставот да не застане само на своите наоди, туку и да ги прецизира правните последици, за секој поединец или група што ги прави! Само целосна правда е правда!“, додаде Харадинај.
На седницата на Главниот одбор на Самоопределување, Курти изјави дека Уставниот суд функционира како сенка на опозицијата. Според него, судот намерно ги одложува, попречува и блокира процесите што се корисни за граѓаните.