21
Три руски борбени авиони МиГ-31 го нарушиле естонскиот воздушен простор, соопшти естонската влада во петокот, нарекувајќи го инцидентот „невидено груб“, објави Скај њуз.
Според официјално соопштение, руските авиони останале во дел од естонскиот воздушен простор над Финскиот Залив вкупно 12 минути, без претходна дозвола од надлежните органи.
Естонскиот министер за надворешни работи Маргус Цахна изјави дека Русија го нарушила естонскиот воздушен простор четири пати оваа година, што според него е „неприфатливо само по себе“, додека последниот инцидент го опиша како „невидено дрзок“.
„Русија сè повеќе ги тестира границите и покажува агресија, што бара брзо зголемување на политичкиот и економскиот притисок“, рече Цахна во изјава за медиумите.
Тој додаде дека Естонија ќе ги информира сојузниците на НАТО за инцидентот и ќе продолжи да се залага за решителен заеднички одговор на слични провокации.
Естонија стана третата членка на НАТО што пријави повреда на нејзиниот воздушен простор од страна на Русија во последните недели.
Минатата недела, Романија објави дека руски дрон влегол во нејзиниот воздушен простор за време на напад врз соседна Украина.
Истата недела, Полска пријави „невидено кршење“ на нејзиниот воздушен простор од страна на руските сили.
Естонската влада, исто така, соопшти дека во мај, руски борбен авион накратко влегол во воздушниот простор на НАТО над Балтичкото Море додека се обидувал да пресретне танкер за кој се сомнева дека припаѓа на руската флота во сенка, што ги крши западните санкции против Москва.