5
Кипар е лидер во преместувањето на барателите на азил од островот во други земји-членки на ЕУ во рамките на Механизмот за доброволна солидарност. Само во изминатата година, бројот на мигранти кои нелегално влегуваат во земјата се намалил за 67%, објавија миграциските власти.
Строгата имиграциска политика на владата и нејзиниот стремеж кон создавање одржлив систем за азил даваат важни резултати, изјави заменик-министерот за миграција Николас Јоанидис.
Во текот на изминатите 3 години, повеќе од 3.000 баратели на азил го напуштиле островот во 9 европски земји, рече тој. Ова е најголем број преместувања меѓу петте медитерански земји на првата линија на миграцискиот притисок што учествуваат во Европскиот механизам за доброволна солидарност – Кипар, Грција, Италија, Малта и Шпанија, нагласи заменик-министерот.
Тој ја забележа „опипливата европска солидарност и во ублажувањето на пренатрупаноста на прифатните центри во Кипар и во заштитата на правата на оние што бараат меѓународна заштита“.
Во исто време, бројот на нелегални пристигнувања на островот и нови барања за азил значително се намали, а бројот на нелегални мигранти што го напуштаат Кипар се зголеми.
Од јануари до август оваа година, оние што нелегално влегле во земјата биле за 67% помалку отколку во истиот период минатата година, додека бројот на државјани од трети земји што го напуштиле Кипар се зголемил за 21%, објави и Николас Јоанидис.
Поради зголемената контрола врз нелегалната миграција, бројот на лица сместени во првиот прифатен центар „Пурнара“ во близина на Никозија нагло се намали – од околу 3.000 во 2022 година на 250 лица во август оваа година.
Се очекува новата инфраструктура да биде завршена на почетокот на следната година, што ќе овозможи поефикасно управување со миграциските процеси, рече надлежниот заменик-министер.
Тоа се Прифатниот центар за баратели на меѓународна заштита и Центарот за прелиминарно сместување на мигранти пред депортација. Тие се градат со европско финансирање, пренесе БНР.