Кандидатот за градоначалник на Град Скопје од ВМРО-ДПМНЕ, Орце Ѓорѓиевски, во интервју за Прес24 вели дека јвниот превоз во Скопје мора да се издигне на нивото на модерен систем, како во големите метрополи.
-Да биде ефикасен, интегриран и достапен за сите. Мојот пристап е практичен, бидејќи нуди воспоставување на поврзан систем кој ќе ги обедини градските и приватните автобуси, брзите автобуски линии, градскиот воз во соработка со Владата, односно Министерството за транспорт и врски, велосипедските мрежи и пешачките коридори во една дигитално координирана платформа. Со тоа Скопје ќе добие превоз по европски стандарди, точен, брз, еколошки и достапен за секој граѓанин. Клучен дел од оваа трансформација е целосната обнова на возниот парк, новите сообраќајни решенија и удвојувањето на бројот на велоспиедските патеки, што ќе ја намали зависноста од автомобилите, ќе го растовари метежот на улиците и ќе ја претвори нашата метропола во поуреден, поеколошки и поквалитетен град за живеење, смета Ѓорѓиевски.
Тој посочува дека сообраќајот во главниот град ќе го решаваат системски, а не парцијално. Клучна насока ќе биде растеретување на метежот преку довршување на започнатите булевари и изградба на нови, пробивање на улици, изградба на нови кружни текови, мостови и катни гаражи кои се дел од решенијата за сообраќајот во мирување.
Во однос на сообраќајот и централното градско подрачје, Ѓорѓиевски има план за постепено намалување на сообраќајот во центарот, се до негово потполно згаснување.
-Како пилот-проект, ќе воведеме викенди без автомобили во “Малиот Ринг”, за да му го вратиме просторот на граѓаните и да ја намалиме загаденоста. Целта е во иднина центарот да стане зона со “нула автомобили”, како што е случај во современите европски метрополи, на пример, во Љубљана, вели Ѓорѓиевски.
Целото интервју може да го прочитате ТУКА.