При инспекциски надзори кај 23 продавници за продажба на тутун и тутунски производи, Државниот пазарен инспекторат (ДПИ) утврдил дека 16 од нив продавале производи без документи за набавка и без акцизни марки. Контролите биле спроведени на 17 и 18 ноември во Скопје, Тетово, Гостивар, Кичево и Струга.
Од ДПИ информираат дека се одземени над 3.000 пакувања тутунски производи, со проценета вредност од над еден милион денари. Производите се предадени на Агенцијата за управување со одземен имот.
За утврдените неправилности, Пазарниот инспекторат издал прекршочни платни налози, а известувања се доставени и до Царинската управа и Министерството за внатрешни работи за понатамошно постапување.
Инспекторатот најавува дека засилените контроли ќе продолжат за откривање и санкционирање на нелегалната трговија.
„Акцијата е дел од нашата посветеност во борбата против корупцијата и криминалот“, стои во соопштението на ДПИ.