3
Американскиот претставник во НАТО, Метју Витакер, на безбедносната конференција во Берлин изјави дека Германија еден ден би можела да го назначува врховниот командант на сојузничките сили во Европа, позиција што ја држат исклучиво американски генерали повеќе од 70 години.
Витакер рече дека ова е долгорочна визија на Вашингтон, бидејќи очекува Европа да преземе поголема одговорност за сопствената одбрана, објави „Тајмс“.
Претставникот на Германија во НАТО, генерал-потполковник Волфганг Вин, рече дека позицијата е „премногу важна“ и дека треба да се „разгледа внимателно“.
Генерал Вин додаде дека Европа сè уште е попречена од комплицирана бирократија што го отежнува движењето на воена опрема меѓу земјите, па дури и во нив.
Тој исто така рече дека три сојузници на НАТО ја блокираат размената на важни податоци во главната логистичка команда.
Позицијата Врховен командант на сојузничките сили во Европа традиционално ја држи американски генерал со четири ѕвездички поради директната врска со американскиот претседател и можноста да командува со големи американски сили, вклучително и нуклеарни капацитети.
За многу европски земји, тоа е исто така клучен симбол на американските безбедносни гаранции, проценува „Тајмс“.
Витакер нагласи дека американскиот претседател Доналд Трамп цврсто стои зад Член 5 и важноста на НАТО.
Тој го пофали Берлин за согласноста за нови цели за трошење – 3,5 проценти од БДП за војската и уште 1,5 проценти за пошироки безбедносни потреби, до 2029 година.
„Се радувам на денот кога Германија ќе каже дека е подготвена да ја преземе командата со силите на НАТО во Европа. Можеби за 15 години, можеби порано“, рече Витакер.
Според него, посилната европска одбрана ќе го олесни и товарот врз американските даночни обврзници на долг рок.