Од крајот на минатата недела се кршат копјата во Собранието за над 200 амандмани поднесени од пратениците најмногу од опозицијата, на Предлог-буџетот за 2026 година. Денешната расправа започна со повеќе амандмани од пратениците од албанската опозиција. Бараа повеќе пари за јавни комунални претпријатија, канализации, речни корита, пари за локални инфраструктурни проблеми на граѓаните, кои не беа прифатени.
„Што ние како пратеници допринесуваме со тие средби со граѓаните? Правиме средби, како можеме да им излеземе на пресрет на тие граѓани. Еве дали некој од вас пратеници, вклучувајќи и самиот себеси сме поставиле прашање дали некогаш сме исполниле некое барање на граѓаните“, изјави Снопче.
„Амандманот кој што почитуваниот пратеник го побара не се прифаќа“, рече Јанкуловски.
„Еден од приоритетите на оваа Влада со програмата 2024-2028 година е поддршката на општините и секако рамномерниот регионален развој. Од самиот почеток широко со поддршка на парламентот, пратениците на сите вас се даде поддршка на таа програма, поготово во делот на финансирањето на општините“, изјави Јанкуловски.
Најголемиот дел од амандманите од опозициските партии до сега не беа прифатени од пратениците од власта. Станува збор за амандмани со кои се бараа повеќе пари за локални инфраструктурни проекти, до раст на плати во министерства, како и повеќе пари за институции и мали и средни компании. Деновиве, делумно беше прифатен амандманот за повеќе пари за Оперативно техничката агенција ОТА.
Пленарната седница, пак на која ќе се разгледува Предлог-буџетот за 2026 година, според најавите, е планирано да се одржи на 9 декември.