10
Претседателот Александар Вучиќ изјави дека Србија „влегла во изборна година“ и дека единственото прашање е дали претседателските избори ќе се одржат заедно со парламентарните. Тој додаде дека сè уште нема вести од САД во врска со Нафтената индустрија на Србија и дека утре ќе биде организиран „голем состанок“ по овој повод.
„Влегуваме во изборна година, ќе имаме избори најдоцна за една година“, изјави Вучиќ пред новинарите во селото Толиќ во близина на Мионица.
Вучиќ рече дека сега останува да се подготват за изборите и да се види кој ќе учествува на нив, колку листи и кои кандидати.
Тој уште еднаш рече дека Српската напредна партија (СНС) успеала да победи на локалните избори во Сечањ, Мионица и Неготин „и покрај една година терор и невозможни услови“ за кои ги обвини претставниците на опозицијата.
„Никогаш не сум задоволен (со резултатите од изборите) и секогаш барам повеќе. И сè е лесно за нив (опозицијата). Ќе доведат бандити и ветерани, ќе тепаат луѓе по кафулиња… Што друго прават – ништо! И секогаш се морални победници. Само победувајте на тој начин, а ние ќе победуваме вака“, рече Вучиќ.
Вучиќ исто така рече дека, и покрај изборната победа, СНС мора детално да анализира каде можело да се направи повеќе и што треба да се постигне за да се подобрат резултатите.
„Ќе мора да направиме големи и значајни промени“, рече Вучиќ.
Нема вести во врска со санкциите врз НИС
Вучиќ, исто така, изјави дека сè уште нема вести од САД во врска со Нафтената индустрија на Србија и дека утре ќе биде организиран голем состанок по овој повод, пренесе РТС.
Вучиќ рече дека Србија ја очекува тежок период, но дека земјата се подготвила за тоа.
„Немам вести, не верувам дека ќе има. Тежок период нè очекува, но ние се подготвивме. Утре во 10:30 часот имаме голем состанок, дотогаш треба да ги подготвиме сите потези и ќе ве информираме што правиме“, им рече Вучиќ на новинарите во селото Толиќ во близина на Мионица.