По една недела по лизгањето на земјиштето во Шипковица, 17 жители од четири куќи и натаму не можат да се вратат во своите домови од страв дека повторно би можело да има свлечиште. Мумин Велија вели дека во моментов престојува кај брат му, додека преку ден настојува да биде во неговата куќа која е во ризик, бидејќи, како што истакнува тој, и кај неговиот брат нема услови за живеење.
„Тие што нè евакуираа од куќата беа вчера и ни рекоа дека одржале состанок, и дека во четврток ќе дојде и самиот градоначалник, така ни кажа раководителката на Центарот за управување со кризи и Црвениот крст. До сега не, но за четврток рекоа дека ќе одлучат. Ние сме кај брат ми, таму е тесно. Не сум се вратил, доаѓаме, чистиме и навечер сум таму, и ќе се вратиме ако нема некое друго решение. Тука мора да се изгради потпорен ѕид што е можно побрзо, затоа што сме во голем ризик, и ние и тие, бидејќи и нивните куќи се во опасност да се излизгаат надолу.“, вели Мумин Велија.
Од општина Тетово велат дека кризниот штаб одржал состанок и констатирал дека таму има ризик за жителите, и по наредба на СВР Тетово жителите се евакуирани.
„Општинскиот кризен штаб одржа состанок, на кој беа разгледани две точки од дневниот ред и беше констатирано дека состојбата е сериозна и бара итно решение. Беше известена и владата, а на состанокот учествуваа претставници од Дирекцијата за заштита и спасување, Центарот за управување со кризи, општината и Министерството за внатрешни работи. Исто така, беше побарано стручните екипи да излезат на терен и да ја проценат ситуацијата. Од страна на СВР беше побарано да се евакуираат жителите и да се ограничи пристапот во делот каде што имаше лизгање на земјиштето.“, вели Албион Алили.
На терен, екипата на ТВ21 не забележа никаков сигурносна лента, ниту знак за забрана за движење или предупредување дека постои опасност.