28 специјализанти добија решенија за работа во Тетовската болница. Ним им ги доделија министерот за здравство Азир Алиу и директорот на болницата Шкелзен Елезии. Министерот рече дека ова е првата фаза од доделувањето на решенијата.
„Им посакувам овие млади лекари да го дадат максимумот за да напредуваат и да нè направат горди како општество. Тука нема да застанеме, ќе продолжиме и со вториот дел од конкурсот, затоа што според европските стандарди, сè уште ни требаат лекари“, вели министерот за здравство, Азир Алиу.
„Најголемиот недостаток во Клиничката болница во Тетово го имаме на Инфективното одделение, на Хематологија, на Рендгенологија, и верувам дека со овој и следниот конкурс ќе се пополнат и тие работни места“, вели Шкелзен Елези, директор на тетовската болница.
Запрашан до каде е постапката за вработување или доделување решенија за 155-те медицински сестри, директорот Елезии рече дека постапката била прекината поради изборите, но вети дека многу скоро ќе бидат доделени и нивните решенија.
„Се имам обврзано за овој конкурс дека ќе го реализирам! Неколку пати сум го кажал тоа и повторно ќе го кажам – сме во завршна фаза, сега сме во проверка на тестовите што ги работи комисијата. Верувам дека многу скоро ќе заврши ова, а по тоа, од следната недела ќе ги повикаме на интервју, за да ги испочитуваме законските процедури и да стигнеме до реализацијата. Многу скоро ќе се реализира за 155-те. Делот за администрацијата се 25 за моментот, чекаме одобрение од Министерството за администрација и и тоа ќе го реализираме многу брзо“, вели Шкелзен Елези, директор на тетовската болница.
155 медицински сестри во Тетово со недели протестираа затоа што болницата не им исплаќаше плати три месеци, а поголемиот дел од нив беа со договор на дело околу 10 години.