Фатмир Битиќи, пратеник од СДСМ, во емисијата „Бизнис21“ на ТВ21 ја критикуваше економската политика и проекциите на буџетот за 2026 година, оценувајќи ги како нереални и потенцијално предизборни.
„Осумнаесет месеци слушаме иста реторика за расипништвото, дигитализација и капитални инвестиции. Се зборува дека градежништвото ќе биде генератор на економски раст, а главните изведувачи и работници на големите проекти се странци – на пример, на Коридор 8 од 2.500 работници, 2.200 се од странство. Како тоа ќе генерира вистински раст за македонската економија?“, рече Битиќи.
Тој посочи дека предвидените приходи во буџетот за следната година (374–375 милијарди денари) се значително повисоки од очекуваните реални приходи оваа година (околу 310 милијарди денари), што остава празнина од околу 55 милијарди денари.
„На што се темели дополнителниот приход од 55 милијарди денари? Ова е нереален и предизборен буџет, кој отстапува од законските и фискалните одредби“, изјави Битиќи.
Тој додаде дека, и покрај оптимистичките бројки за раст од 3,7–5%, според него тие се тешко остварливи и се далеку од реалната економска состојба. „Државата не може да се води со преседани и прилагодувања по желба, особено кога се работи за расходната и приходната страна на буџетот“, заклучи Битиќи.