Љупчо Пренџов, пратеник од ВМРО-ДПМНЕ, во емисијата „Бизнис21“ на ТВ21 ги коментираше економските проекции на Буџетот за следната година, изразувајќи скепса, но и потенцијален оптимизам за економскиот раст.
„Проекцијата за раст на буџетот е 3,8%, инфлацијата 2,5%, а дефицитот 3,5%. Фискалните правила се кршат, јавниот долг е под 60%, но на што се темели ваквиот оптимизам кога веќе сме при крај на годината?“, праша Пренџов.
Тој додаде дека растот на бруто домашниот производ е поставен на многу амбициозно ниво во буџетот и објасни дека, според неговите проценки, со реализација на капиталните инвестиции и активностите на терен, проекцијата од 3,7% може да се надмине и да достигне дури 3,9%, а потенцијално и 4%.
„Клучни сектори за економски раст се градежништвото и капиталните инвестиции, како што се изградбата на автопатите и проектите за брза железница. Покрај тоа, имаме зголемен туризам и проекти во општините кои носат дополнителни приходи, околу 15 милијарди денари инјекција во економијата“, рече Пренџов.
Според него, одговорното работење, штедењето и реализацијата на големите инфраструктурни проекти даваат сигурност дека предвидениот раст е остварлив.
„Затоа сметам дека овие бројки се реални и можат да бидат дури и поголеми од предвиденото, ако продолжи транспарентното и одговорно работење во економијата“, заклучи Пренџов.